Su wackelt's durch die Strauß'n hi; 
Aff amaul dau denkt's droh, 
Sie haut jo heunt no mit kan Aug' 
Es Köringblot g'schaut oh. 
Wenn s' diz ner wüßt', wer droh kummt heunt, 
Der, daß die Priedi hält, 
Dös mouß sie wiss'n doch dervur 
Um Alles in der Wölt. 
Zon Glück kummt öiz a Herr dauher, 
Der kummt'ra röcht in's Gai, 
Daß dös der neu' Herr Pfarrer is, 
Fällt meiner Frau nit ei. 
Er haut jo ah ka Päffla g'hat, 
Ner su an schwarz'n Ruk. 
Und in der Händ, dau haut er g'schwenkt 
An silberb'schlog'na Stuk. 
Er geiht schöi langsam her sein Weg, 
Wall er si d'rüber b'sinnt, 
Ob er in seiner Priedi wuhl 
In Weg zon Herzi'n find'. 
Der kummt der Frau grod recht in Worf, 
Sie sagt, o senn S' su gout 
Und sog'n S' mer, wer in der Köring 
Heunt Priedi halt'n thout.